როგორ გავზარდოთ ტესტოსტერონი ბუნებრივი მეთოდებით. (აუცილებლად წასაკითხი ნამდვილი მამაკაცებისთვის)

მოგესალმებით მეგობრებო, დღეს მინდა გესაუბროთ მამაკაცურ ჰორმონზე ტესტოსტერონზე, მის მნიშვნელობაზე და ბუნებრივი მეთოდებით მისი დონის გაზრდაზე.

ტესტოსტერონი – ყველაზე მთავარი ანდროგენული ჰორმონია, რომელიც სინთეზირდება თირკმელზედა ჯირკვლის ქერქში, სათესლეებში (მამაკაცებში) და საკვერცხეებში (ქალებში). ჯერ კიდევ საშვილოსნოში მომავალი ბავშვის სქესი დამოკიდებულია ანდროგენულ ჰორმონებზე. მათი კონცენტრაცია ახდენს გენიტალიების ვირილიზაციას, სათესლეების და პროსტატის ფორმირებას.

დღეისათვის ზოგიერთ ახალგაზრდა მამაკაცსაც ტესტოსტერონის დონე აქვს დაბალი, რაც დაკავშირებულია არასწორი ცხოვრების წესთან, კერძოდ: მავნე ჩვევები – მოწევა და დალევა, დაუბალანსებელი კვება, უძილობა, ნაკლები ფიზიკური აქტივობა და ა.შ. აქედან არის პრობლემები ჯანმრთელობასთან და სქესობრივი ჰორმონების გამომუშავებასთან.

რას იწვევს მამაკაცის ორგანიზმში ტესტოსტერონის დაბალი დონე:
სექსუალური ლტოლვის დაქვეითებას.
ძალისა და კუნთოვანი მასის შემცირებას.
დაღლილობას და გაღიზიანებას.
დეპრესიას.
მეხსიერების, უნარების და ყურადღების კონცენტრაციის დაქვეითებას.
მეტაბოლიზმის შენელებას, რაც ზრდის ცხიმის დაგროვებას.

როგორც ხედავთ ტესტოსტერონი უმნიშვნელოვანესი ჰორმონია მამაკაცებისათვის.

როგორ გავზარდოთ ტესტოსტერონი ბუნებრივი მეთოდებით.

კვება.

ნორმალური კვების გარეშე არ გექნებათ ტესტოსტერონი ნორმაში. ჰორმონების გამომუშავება არის ურთულესი პროცესი ორგანიზმისთვის, რომელშიც ჩართულია ბევრი ორგანო. იმისათვის, რომ ეს პროცესი წავიდეს, ორგანიზმი უნდა მოვამარაგოთ საჭირო ნივთიერებებით.

ტესტოსტერონის სინთეზისათვის ჩვენს ორგანიზმს უნდა მივაწოდოთ აუცილებელი ნივთიერებები:

მინერალები.

ტესტოსტერონის მოლეკულის მთავარი საშენი მასალაა თუთია (ცინკი), რომლის გარეშეც შეუძლებელია ტესტოსტერონის სინთეზი. თუთიას (ცინკს) შეიცავს ზღვის პროდუქტები და ყველანაირი თხილეული მზესუმზირასთან ერთად.

ტესტოსტერონის ბიოსინთეზისთვის სხვა აუცილებელი მინერალებია სელენი, მაგნიუმი და კალციუმი.

ვიტამინები.

რა თქმა უნდა ჯანმრთელობისთვის ყველა ვიტამინი აუცილებელია, მაგრამ ტესტოსტერონის სინთეზისთვის აუცილებელია ვიტამინები C,E,F (ომეგა-3 და ომეგა-6), ასევე B ჯგუფის ვიტამინები. ვიტამინი E იცავს ტესტოსტერონის მოლეკულას დაშლისაგან.

ამ ვიტამინებს შეცავს ციტრუსები, ასკილი, თევზის ქონი, ავოკადო, თხილეული.

ცილები, ცხიმები და ნახშირწყლები არის ჩვენი კვების აუცილებელი კომპონენტები, რომლის გარეშეც არ მიმდინარეობს ბიოქიმიური პროცესები და ტესტოსტერონის სინთეზი. მაგალითად ცხიმები – რომელიც ქოლესტერინის წყაროა და ქოლესტერინი აუცილებელია ტესტოსტერონის სინთეზისათვის. ამიტომ მამაკაცისთვის აუცილებელია ჩართოს თავის რაციონში ხორცი, ოღონდ უცხიმო.

სვით ბევრი სუფთა წყალი, დღეღამეში 2 ლიტრამდე, თუ ვარჯიშობთ უფრო მეტიც გამომდინარე თქვენი წონიდან.

გამორიცხეთ თქვენი რაციონიდან:

დიდი რაოდენობით სწრაფი ნახშირწყლები (ტკბილი გამოცხობილი ნაწარმი, თეთრი პური, ტკბილეული), თუ ზედმეტი წონა გაქვთ საერთოდ გამორიცხეთ.

ცხიმიანი საკვები. ასეთ საკვებს ჩვენი ორგანიზმი მარაგში ინახავს ცხიმის სახით.

გაზიანი ტკბილი სასმელები.

წონის ნორმალიზაცია.

დამტკიცებულია, რომ ზედმეტი წონის მქონე მამაკაცებს აქვთ სასქესო ჰორმონების დაბალი დონე. საქმე იმაშია, რომ ცხიმის ქსოვილებში მამაკაცური ჰორმონები გარდაიქმნება ქალურ ესტროგენებში, და რაც მეტია ესტროგენები, მით ნაკლებია ტესტოსტერონი.

ფიზიკური აქტიურობა და სიმძიმეებით ვარჯიში.

დამტკიცებულია, რომ სიმძიმეებით ზომიერი ვარჯიში ზრდის ტესტოსტერონის დონეს. ამიტომ თუ გვინდა ტესტოსტერონის დონის აწევა, უნდა ვივარჯიშოთ სწორად და არ უნდა გადავაჭარბოთ, თორემ მივიღებთ საპირისპირო შედეგს.

სიმძიმეებით ვარჯიშით ტესტოსტერონის დონის მაქსიმალურად ამაღლების ძირითადი წესები:

1. ვარჯიშის ხანგრძლივობა არ უნდა აღემატებოდეს 1 საათს, 10 წუთი მოთელვა და 45-50 წუთი ძალისმიერი ვარჯიში. ვინაიდან 50 წუთიანი ვარჯიშის მერე ტესტოსტერონის ნაცვლად ორგანიზმი გამოიმუშავებს ტესტოსტერონის ანტაგონისტ კატაბოლურ ჰორმონს კორტიზოლს, რომელიც იწვევს კუნთის დაშლას.

2. ვარჯიშების რაოდენობა არ უნდა აღემატებოდეს 2-3 – ჯერ კვირაში. ვარჯიშებს შორის დასვენების დღეები აუცილებელია ორგანიზმის ძალების და კუნთების აღდგენისათვის.

3. ავარჯიშეთ ძირითადად დიდი კუნთები: ფეხები, ზურგი და მკერდი. უფრო მეტად აკეთეთ ბაზისური ვარჯიშები: შტანგის ამოწევები, ჩაჯდომები, წოლჭიმი, არმიული (ჯარისკაცის) ჟიმი და ა. შ.

4. წონები შეარჩიეთ ისე, რომ შეძლოთ 6-10 გამეორება, მე-10 უკვე დიდი გაჭირვებით რომ აწიოთ.

ეს ოთხივე ძირითადი კრიტერიუმი უნდა დაიცვათ, თუ გინდათ რომ თქვენი მამაკაცური ჰორმონები იყოს მაქსიმალურ დონეზე. ეს წესები არ არის ჩემი გამოგონილი, ეს დაფუძნებულია მეცნიერულ გამოკვლევებზე.

გამორიცხეთ მავნე ჩვევები.

ალკოჰოლის ორგანიზმში მოხვედრისას ის ტესტოსტერონის მოლეკულას გარდაქმნის ქალურ ესტროგენად. თანაც გრადუსს მნიშვნელობა არა აქვს. ლუდი თვითონ შეიცავს ქალური ჰორმონის ანალოგებს, რაც კატასტროფულად მოქმედებს მამაკაცის ჰორმონალურ ფონზე. გამონაკლისია ზომიერად მიღებული ნატურალური ღვინო.

იგივე შეიძლება ითქვას ნიკოტინზეც.

ძილის მოწესრიგება.

სასქესო ჰორმონების წარმოება ორგანიზმში ხდება ღრმა ძილის ფაზაში და თუ მუდმივად იქნებით გამოუძინებელი, რაც არ უნდა მოიმოქმედოთ ტესტოსტერონის დონეს ვერ გაზრდით. ჯანმრთელი ძილი უნდა გაგრძელდეს 8 საათს სიწყნარესა და სიბნელეში.

დამატებითი რეკომენდაციები ტესტოსტერონის დონის ამაღლებისთვის:

ეცადეთ იყოთ სექსუალურად აქტიურები. ზომიერი სექსუალური კონტაქტები ზრდის სასქესო ჰორმონების დონეს, ოღონდ არ გადააჭარბოთ, რომ არ მიიღოთ უკუშედეგი. ქალებთან მსუბუქი ფლირტიც კი მაღლა წევს ჰორმონების დონეს.

მოერიდეთ სტრესულ სიტუაციებს. სტრესის დროს აქტიურად გამოიყოფა ჰორმონი კორტიზოლი რომელიც ამცირებს მამაკაცურ ჰორმონს. ამიტომ ეცადეთ უფრო ხშირად იყოთ კარგ გუნება-განწყობილებაზე, რასაც მოყვება ჰორმონალური ფონის ამაღლება.

ეცადეთ გაიმარჯვოთ. გამარჯვება ზრდის ტესტოსტერონს! ამ ჰორმონს გამარჯვებულების ჰორმონსაც ეძახიან.

დღეისათვის საკმარისია, ვფიქრობ ამ სტატიით ბევრ კითხვაზე მიიღეთ პასუხი და იმედია აღარ დასვამთ კითხვას, რატომ უნდა იკვებოთ სწორად, რატომ არ უნდა ივარჯიშოთ 1 სათზე მეტი და რატომ უნდა აკეთოთ ბაზისური ვარჯიშები, რატომ უნდა იძინოთ 8 საათი და საერთოდ რატომ იცხოვროთ ჯანსაღი ცხოვრების წესით.

ავტ. ირაკლი კენჭოშვილი – ფიტნეს-ცენტრ „თიდანის“ პერსონალური მწვრთნელი.

⭐ ⭐ ⭐ ვისაც გინდათ ჩემი პირადი მეთვალყურეობის ქვეშ ვარჯიში, უნდა მოხვიდეთ ფიტნეს-ცენტრ „თიდანის“ ფილიალში ყაზბეგის გამზ. 11ა, მეტრო სამედიცინოსთან, ან დამიკავშირდეთ ტ. 5 93 39 02 23

კვებაზე ჩემი სხვა პოსტები შეგიძლია ნახო http://tidani.ge/?cat=28

თუ მოგეწონა ეს პოსტი, გაუზიარე მეგობრებს და არ დაგავიწყდეს ჩემი ფეისბუქის გვერდის “ფიტნეს-ინსტრუქტორის რჩევები” – ის დალაიქება.

Facebook Comments

კომენტარის დატოვება